AQSH vaʼdasining ustidan chiqmadi —Amir Xon Mutaqqiy
Afg‘oniston TIV rahbari Vashington bilan erishilgan kelishuvlarni ochiqladi.
Afg‘oniston tashqi ishlar vaziri vazifasini bajaruvchi Amir Xon Mutaqqiy AQSHni mavjud kelishuvlarni buzishda aybladi. Bu haqda u “RIA Novosti”ga bergan intervyusida aytgan.
“AQSH ayrim vaʼdalarining ustidan chiqmadi. Masalan, shartnomada islom amirligi (“Tolibon” Afg‘onistonda tuzilgan yangi davlatni shunday nomlaydi, u hech qaysi davlat tomonidan tan olinmagan) asirlarini bir necha kun ichida ozod qilish belgilangan. Ammo bu biz Kobul va boshqa viloyatlarni nazoratga olmagunimizcha amalga oshmadi, ularni o‘zimiz ozod qildik”, – degan TIV rahbari.
Shu bilan birga Mutaqqiy Vashington yangi hukumat rasmiy vakillarini qora ro‘yxatdan chiqarmaganini qayd etdi. Bu ham o‘zaro kelishuvlarning shartlaridan biri bo‘lgan.
“AQSH AFg‘oniston tiklanishida yordam berishni va boshqa davlatlarni bunga chaqirishga vaʼda bergandi. Buning o‘rniga ular sanksyalar joriy etdi”, – deb aytgan siyosatchi.
Shunday bo‘lsa-da, “Tolibon” tashqi ishlar vaziri Kobul Amerikaga berilgan kafolatlarni ustidan chiqqanini aytgan. Uning so‘zlariga ko‘ra, AFg‘oniston AQSH bilan iqtisodiy hamda diplomatik aloqalarni saqlab qolishi kerak bo‘lgan va bu amalga oshirilgan.
Eslatib o‘tamiz, avvalroq “Tolibon” vakili ayollarning mudofaa sohasida ishlashi mumkinligini aytgani to‘g‘risida xabar qilingandi.
Jahongir Qo‘ziyev
