Афғонистонда аёллар мудофаа соҳасида фаолият олиб бориши мумкин. Бу ҳақда "Толибон"нинг Бадахшон вилоятидаги раҳбарларидан бири Муазуддин Аҳмадий маълум қилган.
Аҳмадий бу ҳақда Бадахшон аёллари вакили Нисо Муборизнинг лавозимига киришиш маросимида айтган. Унинг сўзларига кўра, Афғонистонда аёллар турли соҳалар, хусусан, мудофаа ва хавфсизлик йўналишларида ишлаши мумкин.
Нисо Мубориз эндиликда вилоят аёлларини иш билан таъминлашда афғон ва халқаро ташкилотлар билан ҳамкорликка масъул. Унинг қайд этишича, Ашраф Ғани президентлиги давридаги таълим ҳужжатларида аёлларга эркаклар билан тенг имконият берилгани белгиланган бўлса-да, амалда уларга ҳеч қандай имкон берилмаган.
Эслатиб ўтамиз, аввалроқ Покистон бош вазири Имрон Хон АҚШ барибир Толибон ҳокимиятини тан олишини маълум қилганди.
Жаҳонгир Қўзиев