Rossiyaga chegaradosh davlat NATOga qo‘shilishi mumkin
Bu mamlakatda aholi fikri keskin o‘zgargani maʼlum qilindi.
Finlyandiya hukumati NATOga aʼzolikni muhokama qilish uchun ochiq. Bu haqda mamlakat prezidenti Sauli Niinistyo maʼlum qildi.
"Finlyandiyada ham, Shvetsiyada ham vaziyat o‘zgardi. Birinchidan, so‘rovnomalar natijalariga ko‘ra, ko‘pchilik odamlar NATOga qo‘shilishimizni yoqlaydi. Shuning uchun biz buni parlamentda muhokama qilishga ochiqmiz", — degan u Fox News telekanaliga bergan intervyusida.
Uning qo‘shimcha qilishicha, bu masala samarali va imkon qadar tezkor ko‘rib chiqiladi.
Fevral oxirida Finlyandiya aholisi o‘rtasida o‘tkazilgan so‘rovnomaga ko‘ra, 53 foiz respondentlar Shimoliy Atlantika blokiga qo‘shilishni maʼqullagan. Ushbu so‘rovnomani tashkillashtirgan Yle telekompaniyasi maʼlumotlariga ko‘ra, NATOga qo‘shilish tarafdorlari 2017 yildan buyon 34 foizga oshgan.
Maʼlumot o‘rnida: Finlyandiya harbiy jihatdan neytral davlat hisoblanadi. U shu paytga qadar ham Rossiya, ham G‘arb bilan yaxshi aloqalarga ega bo‘lgan. Xelsinki YEI aʼzosi bo‘lsa-da, NATOga kirmagan. Ammo Rossiyaning Ukrainadagi harbiy operatsiyasi asta-sekin alyans tomon xarakatlarga sabab bo‘lmoqda.
Eslatib o‘tamiz, avvalroq Ukraina gumanitar halokat yoqasida turgani to‘g‘risida xabar berilgandi.
