Xitoy hech qachon Tayvan mustaqilligiga chidab turmasligini maʼlum qildi
Shuningdek, dunyoda yagona Xitoy davlati borligi taʼkidlangan.
Xitoy hech qachon Tayvan mustaqilligiga yo‘l qo‘ymaydi. Bu haqda mamlakat mudofaa vazirligi rasmiy vakili U Syan maʼlum qildi.
“Biz "bir davlat – ikki tizim” tamoyili asosida tinch birlashish tarafdori bo‘lib qolyapmiz. Tayvan bo‘g‘ozining ikki qirg‘og‘i tinch asosda birlashishi uchun bor kuchimizni ishga olamiz. Ammo biz hech qachon “Tayvan” mustaqilligiga harakat qilayotgan ayirmachi kuchlarning xatti-harakatlariga chidab tura olmaymiz", – degan u.
U Syan dunyoda yagona Xitoy borligini, Tayvan esa uning ajralmas qismi ekanini taʼkidlagan. Uning so‘zlariga ko‘ra, bu masala Xitoyning ichki muammosi hisoblanadi va unga chet davlatlar aralashuvi maqbul emas. “AQSH va Yaponiya Tayvan masalasida qanchalik shovqin ko‘tarsa, biz davlat suvereniteti va hududiy yaxlitligi yo‘lida yana-da qatʼiy harakat qilamiz”, – deb qo‘shimcha qilgan rasmiy vakil.
Maʼlumot o‘rnida: Tayvan 1949 yildan buyon amalda XXRdan mustaqil siyosat olib boradi. U Xitoyning ajralmas qismi ekanini butun dunyo, jumladan, AQSH ham tan oladi. Shu bilan birga aksariyat davlatlar Tayvanning Xitoy tarkibiga zo‘ravonliksiz va kuch ishlatishsiz qaytishi zarurligini taʼkidlab keladi.
Eslatib o‘tamiz, avvalroq Xitoy TIV AQSH bilan Pekin o‘rtasida ochiq qarama-qarshilik vujudga kelishi mumkinligi to‘g‘risida maʼlum qilgandi.
