Rossiyaga qarshi iqtisodiy urush ketmoqda — Sergey Ryabkov
RF tashqi ishlar vaziri o‘rinbosari AQSH sanksiyalari Ukrainadagi urushga bog‘liq emasligini ochiqladi.
Rossiyaga qarshi sanksiyalar har qanday sharoitda joriy qilingan bo‘lar edi. Bu haqda RF tashqi ishlar vaziri o‘rinbosari Sergey Ryabkov maʼlum qildi.
“Amerkaliklarning bizga zarar yetkazishini bilardik. Hozirda kuzatilayotgan vaziyatga oldindan tayyorlangan edik. U (Ukrainadagi) maxsus operatsiyaga aloqador emas”, – degan diplomat.
Uning fikricha, Kiyevga qarshi harbiy amaliyot o‘tkazilmagan taqdirda ham Vashington cheklovlar joriy etish uchun bahona topgan bo‘lar edi.
Shuningdek, Ryabkov Qo‘shma Shtatlar Rossiyaga qarshi iqtisodiy urush eʼlon qilganini taʼkidladi.
“G‘arb barcha niqoblarni tashladi. RFga qarshi ochiq iqtisodiy urush eʼlon qilingan”, – deb qayd etdi u.
Eslatib o‘tamiz, avvalroq Belarus mudofaa vazirligi Ukraina mamlakatdagi vaziyat ustidan nazoratni yo‘qotganini maʼlum qilgandi.
