Armaniston va Turkiya “do'stlashmoqda”

 

Armaniston va Turkiya hech qanday shartlarsiz munosabatlarni normallashtirish ustida ishlashga tayyorligini tasdiqladi. Bu haqda Armaniston tashqi ishlar vaziri Ararat Mirzoyan Antaliyada Turkiya tashqi ishlar vaziri Mevlut Chavusho‘g‘li bilan uchrashuvdan so‘ng ma’lum qilgan.

 

“Uchrashuvimiz chog‘ida biz har ikki tomon o‘zaro munosabatlarni o‘rnatish va chegaralarni hech qanday shartlarsiz ochish maqsadida kelishuv jarayonini davom ettirishga tayyorligini tasdiqladik” , dedi Mirzoyan.

 

U Armaniston va Turkiya vakillari bu borada ish olib borayotganini ta’kidlab, yaqin kelajakda ijobiy natijalarga umid bildirdi. 

“Mintaqadagi barcha xalqlar, barcha davlatlar mintaqamizda tinchlik va barqarorlik o‘rnatishga intilayotganini ko‘rib xursandman. Va shuni aytmoqchimanki, Armaniston tinch va barqaror mintaqaga ega bo‘lishga tayyor”, deya qo‘shimcha qildi vazir.

 

Malumot uchun: Umumiy chegaraga qaramay, Armaniston va Turkiya o'rtasida diplomatik aloqalar mavjud emas. 2009-yilda Tsyurixda ikki davlat tashqi ishlar vazirlari diplomatik munosabatlar o‘rnatish va munosabatlar tamoyillari to‘g‘risidagi protokollarni imzolagan, biroq bu hujjatlar tomonlar tomonidan ratifikatsiya qilinmagan. 2018-yil 1-mart kuni Armaniston protokollar bekor qilinganligini e’lon qildi. 2021-yilda Armaniston va Turkiya kelishuv masalalari bo‘yicha maxsus vakillarni tayinladi. Turkiyaning AQShdagi sobiq elchisi Serdar Qilich bu lavozimni Anqarada, Yerevandan esa parlament spikeri o‘rinbosari Ruben Rubinyan egalladi.

Yerevan va Anqara vakillari birinchi uchrashuvini 14 yanvar kuni Moskvada, ikkinchi uchrashuvini 24 fevral kuni Venada o‘tkazdi. Yerevan muzokaralar jarayoni dinamikasini ijobiy baholab, Turkiya bilan chegaraning ochilishi Armaniston tomoni uchun ustuvor vazifa ekanini qayd etdi.