Bahodir Jalolov chempionlikka qadar kurashadi
Olimpiada va jahon chempioni kecha professional boksda 10-g‘alabasini qo‘lga kiritdi.
Kuni kecha Birlashgan Arab Amirliklarining Dubay shahrida “Probellum Dubai” boks kechasi bo‘lib o‘tdi. Unda Olimpiada va jahon chempioni Bahodir Jalolov professional boksdagi 10-jangida ishtirok etdi.
Bahodir Jalolovga bu bahsda polshalik Kamil Sokolovski raqiblik qildi. 8 raunddan iborat jangda Jalolov 5-raundda raqibini chap qo‘lda yo‘llagan zarbasi bilan ringda qulatdi va texnik nokaut bilan g‘alaba qozondi. O‘zbekistonlik og‘ir vaznli bokschi uchun bu ketma-ket 10-g‘alaba bo‘ldi.
Bahodir Jalolov Zamon.uz muxbiriga jang haqidagi fikrlarini bildirdi.
“Kechagi jangim ajoyib o‘tdi. Raqibim ko‘p mag‘lubiyatga uchragan bo‘lsa ham kamdan-kam sportchi uni nokautga uchratgan. U juda chidamli bokschi. Shuning uchun 8 raundli jangga tayyormanmi- yo‘qmi degan savol ko‘p o‘ylantirdi. Biroq mana Alloh kuch berib, raqibimni 5-raunddayoq nokautga uchratdim”.
Jalolov keyingi janglari orqali og‘ir vazn toifasida chempionlik uchun kurash olib borishini ma’lum qildi.
“Bundan keyin ham shunaqa katta janglarda ishtirok etib, Xudo xohlasa chempionlik jangiga qadar borish niyatimdaman. Meni kechagi jangda qo‘llab-quvvatlagan hammaga rahmat aytaman”.
Olimpiada chempioni yaqinda Prezidentimiz tomonidan sportchilarning mahorat maktalarini ochish haqidagi qarori haqida gapirdi.
“Prezidentimizga ham alohida tashakkurlarimni bildirib qolaman. Yaqinda mahorat maktabimni ochish bo‘yicha qarorlari chiqdi. Bu g‘alabamga qo‘shaloq sovg‘a bo‘ldi, deb o‘ylayman. Nasib bo‘lsa, ushbu maktabdan kelajakda Olimpiya va jahon chempionlari chiqadi. Maktab ochilishidan juda mamnunman”.
Ma’lumot uchun: Jalolov professional boksdagi so‘nggi jangini 2021-yil dekabr oyida kolumbiyalik Xulio Tsezar Kalimenoga qarshi o‘tkazib, ilk raunddayoq g‘alaba qozongandi. Kamil Sokolovski esa so‘nggi jangini shvesiyalik Otto Vallinga qarshi fevral oyida o‘tkazib, o‘sha jangda ham mag‘lub bo‘lgan.
Jamshidbek AMIROV
