NATO Ukrainaga yordam berishda davom etadi
Ammo alyans Rossiya bilan to‘g‘ridan-to‘g‘ri mojaroga yo‘l qo‘yish niyatida emas.
NATO Ukrainani qo‘llab-quvvatlashda davom etadi, biroq alyans Rossiya bilan to‘g‘ridan-to‘g‘ri mojaroga yo‘l qo‘ymaslikka harakat qiladi. Bu haqda NATO bosh kotibi Yens Stoltenberg Bryusselda Shimoliy Atlantika alyansi davlat va hukumat rahbarlarining uchrashuvi arafasida bo‘lib o‘tgan matbuot anjumanida ma’lum qildi.
“Ittifoqchilar ertaga qo‘shimcha yordam berishga rozi bo‘lishini kutaman. Ammo biz jangovar harakatlar Ukraina chegarasidan tashqariga chiqmasligi va NATO va Rossiya o‘rtasidagi mojaroga aylanib qolmasligi uchun javobgarmiz. Bu yanada ko‘proq o‘lim va vayronagarchilikka olib keladi", - dedi alyans bosh kotibi.
Shuningdek, u “NATO ittifoqchilari 2014-yildan beri o‘n minglab ukrainalik askarlarni o‘qitgan va hozir ular oldingi safda”, deb qo‘shimcha qildi.
NATO Ukrainaga kiberxavfsizlik va kimyoviy va biologik hujumlardan himoya qilish sohasida ham yordam beradi.
24-mart kuni tashkilotning Bryusseldagi qarorgohida Ukrainadagi vaziyat va alyans mudofaa qobiliyatini oshirish bo‘yicha NATOning favqulodda sammiti bo‘lib o‘tadi.
