Sanksiyalar tufayli elektromobillar narxi “ko‘tarilib” ketdi
Bunga nikelning bahosi qimmatlashgani sabab bo‘lgan.
Dunyodagi geosiyosiy vaziyat va sanksiyalar siyosati ortidan dunyoda elektromobillar narxi qimmatlashdi. Bu haqda avtomobillar to‘g‘risidagi Edmunds nashri maʼlum qildi.
Elektromobillar akkumulyatorining asosiy komponenti bo‘lgan nikel narxi jahon bozorida uch barobarga qimmatlashgan. Dunyoda ushbu metall ishlab chiqarish bo‘yicha uchinchi o‘rinda turadigan Rossiyaga qarshi sanksiyalar yetkazib berishda katta muammolarni vujudga keltirgan.
Fevral oxirida nikelning tonnasi 30 ming dollarni tashkil etgan bo‘lsa, martning boshida uning qiymati 100 ming dollardan oshdi. London metallar birjasida hatto nikel savdosi to‘xtatib qo‘yildi.
Edmunds‘ning yozishicha, elektron avtomobillarning narxi o‘rtacha 1500-2000 dollarga qimmatlagan. Xususan, Tesla‘ning bahosi 5-10 foizga ko‘tarilgan.
Eslatib o‘tamiz, avvalroq JST sanksiyalar ortidan eng qashshoq davlatlarda ochlik bilan bog‘liq isyonlar sodir bo‘lishi xavfidan ogohlantirgandi.
