Oldinda ko‘p qiyinchiliklar bor — Germaniya prezidenti
Frank-Valter Shtaynmayer Rossiyaga qarshi sanksiyalarning aks ta’siri haqida gapirdi.
Germaniyani og‘ir kunlar kutmoqda. Bu haqda mamlakat prezidenti Frank-Valter Shtaynmayer ma’lum qildi.
Shtaynmayer bu Rossiyaga qarshi kiritilgan sanksiyalarning ta’siri bilan bog‘liqligini aytgan.
“Germaniyani qiyin kunlar kutmoqda. Bu kunlar biz kutgandan ham tez bizni va dunyoni o‘zgartiradi. Oldinda bizni yanada ko‘p muammolar kutyapti”, – degan Shtaynmayer Ukraina bilan birdamlik konsertida so‘zlagan nutqida.
Bundan oldin GFR hukumati Moskvaga qarshi sanksiyalar aks ta’sirga ham ega ekanini ma’lum qilgandi. Xususan, 25 mart kuni Germaniya fermerlari birlashmasi oziq-ovqat mahsulotlari narxining keskin ko‘tarilishidan ogohlantirgandi. Bunga sabab qilib yoqilg‘i va logistika bilan bog‘liq muammolar ko‘rsatilgan.
Avvalroq JST Rossiya-Ukraina mojarosi ortidan dunyoning qashshoq davlatlarida oziq-ovqat isyonlari sodir bo‘lish xavfi borligidan ogohlantirgandi.
