London Afg‘oniston aholisiga 375 million dollar ajratdi
Bu yordam BMTorqali yetkazib beriladi.
Britaniya hukumati Afg‘oniston aholisiga qo‘shimcha gumanitar yordam ajratdi. Bu haqda mamlakat tashqi ishlar vazirligi maʼlum qildi.
Uning umumiy miqdori 286 million funt (374,5 million dollar)ni tashkil etadi.
"Buyuk Britaniya afg‘on xalqini qo‘llab-quvvatlash hamda eng muhim mahsulotlar va dori-darmon yetkazib berishda boshqalarni ortidan ergashtirmoqda. Ittifoqchi va hamkorlarimiz bilan birga Afg‘onistonga yordam berish uchun ko‘proq ishlar qilishimiz mumkin", — degan tashqi ishlar vaziri Liz Trass.
BMT maʼlumotlariga ko‘ra, hozirda 10 million afg‘onistonlik bola gumanitar yordamga muhtoj. London tomonidan ajratilayotgan mablag‘ BMTning turli tuzilmalari orasida taqsimlanadi va to‘g‘ridan-to‘g‘ri "Tolibon" tomonidan tuzilgan hukumatga yo‘naltirilmaydi.
Avvalroq Afg‘onistonda BBC faoliyati taqiqlangani to‘g‘risida xabar berilgandi.
