Yevropa Ittifoqi Rossiya bilan diplomatik aloqalarni davom ettirish niyatida
Shu bila birga Rossiyaga qarshi yangi sanksiyalar ham joriy etiladi.
Yevropa Ittifoqi Rossiya bilan diplomatik aloqalarni davom ettirish zarur deb hisoblaydi. Bu haqda Bryusselda bo‘lib o‘tgan brifingda Yevropa Ittifoqi tashqi ishlar xizmati vakili Piter Stano maʼlum qildi.
"Biz Rossiya prezidentini muammoga sababchi deb bilamiz. Shuning uchun muammoni hal qilishda u bilan aloqalarni davom ettirish kerak. Yevropa Ittifoqi diplomatiya kanallarini ochiq qoldirish zarur deb hisoblaydi" — dedi Piter Stano.
U Yevropa Ittifoqi bir vaqtning o‘zida Rossiya Federatsiyasiga qarshi yangi sanksiyalar bo‘yicha ishlarni tezlashtirish niyatida ekani tasdiqladi. Biroq ularning mumkin bo‘lgan mazmunini izohlashdan bosh tortdi. Uning qayd etishicha, Yevropa Ittifoqining bir qator davlatlari va YI Tashqi ishlar xizmati rahbari Josep Borrel Buchadagi vaziyat haqidagi xabarlarga tayanib, Rossiyaga qarshi sanksiyalar qo‘llashni kuchaytirishni taklif qilgan.
Maʼlumot uchun: 3-aprel kuni Rossiya Mudofaa vazirligi Kiyev rejimining Buchada tinch aholini o‘ldirganlikda ayblaganini rad etdi. Departamentning taʼkidlashicha, Rossiya Qurolli kuchlari 30-mart kuni Buchani to‘liq tark etgan va “jinoyat dalillari” Ukraina Xavfsizlik xizmati xodimlari shaharga kelgan to‘rtinchi kunigina paydo bo‘lgan.
Rossiya Mudofaa vazirligi, shuningdek, 31-mart kuni Bucha meri Anatoliy Fedoruk o‘zining videomurojaatida shaharda rossiyalik harbiylar yo‘qligini tasdiqlaganini, biroq ko‘chalarda otib o‘ldirilgan mahalliy aholini tilga ham olmaganini taʼkidladi.
