Quvayt Livanga o‘z elchisini qaytaradi
Ikki davlat munosabatlari 2021-yil oktabrida yomonlashgan edi.
Quvayt o‘z elchisini Livanga qaytarishga qaror qildi. Bu haqda mamlakat tashqi ishlar vazirligi xabar tarqatdi.
"Livandagi mo‘tadil milliy kuchlarning chaqiriqlari va bosh vazirning Quvayt hamda butun Fors ko‘rfazi arab davlatlari hamkorlik kengashi bilan hamkorlikni mustahkamlash bo‘yicha majburiyatlarini hisobga olib biz o‘z elchimizning Bayrutga qaytishini eʼlon qilamiz, — deyiladi vazirlikning Twitter sahifasida.
Maʼlumot o‘rnida: Livanning arab davlatlari bilan munosabatlari mamlakatning sobiq axborot vaziri Jorj Kordaxining 2021 yil oktyabrida Yamandagi xusiylarning harakatlarini oqlab chiqqani ortidan yomonlashgandi. Dastlab Saudiya Arabistoni, keyinchalik Bahrayn, Quvayt va BAA o‘z elchilarini Bayrutdan chaqirib olgandi.
2022-yil 22-yanvar kuni Quvayt tashqi ishlar vaziri Ahmad Nosir as-Saboh Livanga tashrif bilan keladi va mamlakat prezidenti Mishel Aunga arab davlatlari bilan munosabatlarni yaxshilash shartlarini maʼlum qiladi.
Avvalroq Arab davlatlari Rossiya-Ukraina o‘rtasida vositachi bo‘lishga tayyorligi to‘g‘risida xabar berilgandi.
