“Davrbank” qonunni buzgani uchun jarimaga tortildi
Ma’lum qilinishicha, fuqarolar kartalaridagi pul mablag‘larining noqonuniy yechilishi bo‘yicha shikoyat qilgan.
Markaziy bankning xabar qilishicha, fuqarolardan bank kartasidagi pul mablag‘larini ularning ruxsatisiz yechib olinishi holati bo‘yicha murojaat kelib tushgan.
Murojaatlar o‘rganilganda kafil yoki birgalikda qarz oluvchi hisoblanmagan fuqarolarning bank kartalari qonun hujjatlariga rioya qilinmagan holda ularning roziligisiz tijorat banki tomonidan jismoniy shaxslarga ajratilgan kredit qarzdorligini so‘ndirish uchun biriktirilib, mablag‘lar yechib olish amaliyoti yo‘lga qo‘yilganligi aniqlangan.
Bunday amaliyotni yo‘lga qo‘ygan “Davrbank”ka nisbatan belgilangan tartibda jarima sanksiyasi qo‘llanilgan. Shuningdek, bankka fuqarolarning bank hisobvaraqlaridan (shu jumladan, bank kartalaridan) mablag‘larni qonunchilikka zid ravishda ularning roziligisiz hisobdan chiqarish amaliyotiga chek qo‘yish hamda fuqarolardan shu mazmunda shikoyatlar kelib tushganda ushbu mablag‘larni qaytarib berilishini ta’minlash vazifalari yuklatilgan.
“Shu o‘rinda barcha tijorat banklariga “Banklar va bank faoliyati to‘g‘risida”gi Qonunning 57-moddasida bank xizmatlari iste’molchilarining huquqlari va qonuniy manfaatlari buzilganligi uchun bankka nisbatan choralar ko‘rilishi belgilanganligini eslatib o‘tish joiz”, deyiladi Markaziy bank xabarida.
