Xorazmda “Qishloqqurilishbank” xodimi pora bilan ushlandi
U fuqarolarga subsidiya asosida uy olib berishni va’da qilgan.
Bosh prokuratura huzuridagi Departament va DXX tomonidan o‘tkazilgan tezkor tadbirda “Qishloqqurilishbank” Xonqa filialining katta kassir-nazoratchisi pora bilan ushlandi.
Ma’lum qilinishicha, bank xodimi fuqarolarga Urganch shaharda yangi qurilayotgan ko‘p qavatli uylardan 2 tasini tanishlari yordamida subsidiya asosida 20 yillik ipoteka krediti orqali olib berishni va’da qilib, oldindan kelishilgan 30 mln so‘mni firibgarlik yo‘li bilan olgan vaqtida ashyoviy dalillar bilan qo‘lga tushgan.
Hozirda mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
