Javohir Sindarov shaxmat bo‘yicha xalqaro turnirda 2-o‘rinni egalladi
O‘zbekistonlik shaxmatchi 2 kun avval bronza medalini ham qo‘lga kiritgandi.
Bugun, 11-aprel kuni Birlashgan Arab amirliklarining Fujeyra shahrida “Chess for Life — Fujairah, Ramadan” xalqaro blits-turniri yakunlandi. Ushbu turnirda 25 davlatdan 168 nafar shaxmatchi ishtirok etdi.
Xalqaro bellashuvda o‘zbekistonlik shaxmatchi, grossmeyster Javohir Sindarov ham qatnashdi. U 9 imkoniyatdan 8 ochko jamg‘arib, 2-o‘rinni egalladi.
Ma’lumot uchun, Javohir Sindarov Birlashgan Arab Amirliklarining Sharja shahrida 9-aprel kuni yakunlangan shaxmat bo‘yicha “Ramadan open” xalqaro turnirida ishtirok etib, bronza medali sohibiga aylangan edi.
