Erdo‘g‘an 5 yil ichida ilk bor Saudiyaga keldi
U ikki davlat munosabatlarining yangi bosqichi boshlanayotganini aytgan.
Turkiya prezidenti Rajab Toyyib Erdo‘g‘anni payshanba kuni Saudiya Arabistoniga rasmiy tashrifini boshladi. Bu uning ushbu mamlakatga 2017 yildan keyin ilk kelishi hisoblanadi.
Turkiya yetakchisi va uning rafiqasini Jidda aeroportida Makka amiri Xolid al-Faysal kutib olgan. Qator ekspertlar Erdo‘g‘anning so‘nggi oylarda arab davlatlari bilan mavjud muammolarni olib tashlaganini va ular bilan, eng avvalo BAA va Saudiya Arabistoni bilan yaqinlashishni boshlaganini qayd etgan.
Erdo‘g‘anning o‘zi bu tashrifni Anqara va Ar-Riyod munosabatlarining yangi bosqichi boshlanishi sifatida baholagan.
"Ibiz mintaqada tinchlik o‘rnatilishi va nizolar yakunlanishi uchun harakat qilyapmiz. O‘zaro munosabatlarning yangi davrini boshlashga harakat qilamiz. Bu siyosiy, harbiy va madaniy aloqalarni kuchaytirishni nazarda tutadi. Iqtisodiyotlarimizdagi o‘zaro bir-birini to‘ldiruvchi nuqtalar Saudiyalik investorlarni Turkiyaga jalb qilayotgan omillardan biri hisoblanadi", — degan u.
Hozirda Erdo‘g‘an Saudiya Arabistoni valiahd shahzodasi Muhammad bin Salmon bilan uchrashgan. Ular o‘rtasidagi muzokaralar Al-Salom saroyida, OAV uchun yopiq formatda o‘tgan.
Avvalroq Iroq Turkiyaning mamlakat hududidagi harbiy operatsiyasidan norozilik bildirgandi.
