Tibbiyot oliygohi talabalari uchun vazir stipendiyasi ta’sis etildi
Uning miqdori Ibn Sino nomidagi davlat stipendiyasi miqdoriga tenglashtirilgan.
O‘zbekistondagi tibbiyot oliy o‘quv yurtlari talabalari uchun “Sog‘liqni saqlash vaziri stipendiyasi” ta’sis etildi. Bu xaqda SSV matbuot xizmati xabar berdi.
Qayd etilishicha, bu haqda vazirning tegishli buyrug‘i qabul qilingan. Unga ko‘ra, mazkur stipendiya bakalavriat va magistratura bosqichida tahsil olayotgan yoshlarga beriladi.
Stipendiya har bir tibbiyot oliy ta’lim muassasasining 5 nafargacha nomzodiga bir yil mobaynida ajratiladi. Nomzodlarni saralash haqidagi e’lon tanlov o‘tkazilishidan kamida 1 oy oldin matbuotda e’lon qilinadi.
Nomzodlar tomonidan arizalar mavjud 11 ta tibbiyot oliy o‘quv yurtining “Yoshlar bilan ishlash, ma’naviyat va ma’rifat bo‘limi”ga taqdim etiladi. Hujjatlar navbatdagi bosqichda vazirlikning Fan va ta’lim boshqarmasi tomonidan ko‘rib chiqilgach, vazir buyrug‘i asosida beriladi.
