Xorazmda iste’mol uchun yaroqsiz go‘sht aniqlandi
Jami 150 kg mahsulot yoqib yo‘q qilingan.
Xorazmda iste’molga yaroqsiz go‘sht mahsulotlarini ortib ketayotgan avtomashina aniqlandi. Bu haqda Ichki ishlar vazirligi Jamoat xavfsizligi departamenti xabar berdi.
Qayd etilishicha, Urganch tumanidagi “Cholish” blok-postida “Ellikqal’a–Urganch” yo‘nalishi bo‘ylab harakatlanib kelayotgan “Neksiya” rusumli avtomashina to‘xtatilgan. Transport vositasi tekshirilganda uning yukxonasi va salon qismidan jami 150 kg go‘sht mahsulotlari sanitariya qoidalariga zid ravishda olib ketilayotgani aniqlangan.
Viloyat veterinariya va chorvachilikni rivojlantirish boshqarmasi xodimlari tomonidan ushbu go‘sht mahsulotlari iste’mol uchun yaroqsiz deb topilib, yoqish yo‘li bilan yo‘q qilingan.
Holat yuzasidan fuqaroga nisbatan Ma’muriy javobgarlik to‘g‘risidagi kodeksning 109-moddasi bilan bayonnoma rasmiylashtirilgan.
