O‘zbekiston iftixorlari taqdirlandi

 

Kuni kecha “O‘zbekiston” xalqaro forumlar saroyida O‘zbekiston Milliy Olimpiya qo‘mitasi tashkil etilganining 30 yilligi munosabati bilan tantanali tadbir bo‘lib o‘tdi. Unda Sportni rivojlantirish vaziri Adham Ikramov, Osiyo Olimpiya kengashi, O‘zbekiston Milliy Olimpiya qo‘mitasi rahbariyati, Xalqaro Olimpiya qo‘mitasi va ko‘plab xalqaro sport tashkilotlari, faxriy sportchilar hamda Olimpiya o‘yinlari g‘olib va sovrindorlari ishtirok etdi.

 

Tadbirda dastlab O‘zbekiston Respublikasi Prezidenti matbuot kotibi Sherzod Asadov yurtboshimizning O‘zbekiston Milliy Olimpiya qo‘mitasi va mamlakatimizdagi Olimpiya harakati aʼzolariga yo‘llagan Murojaatnomasini o‘qib eshittirdi. Shundan so‘ng turli nominatsiyalarda g‘oliblarni taqdirlash marosimi o‘tkazildi.

 

Quyida barcha taqdirlangan sportchilar bilan tanishishingiz mumkin:

 

—“Olimpiadalarda eng ko‘p medal keltirgan federatsiya” – O‘zbekiston boks federatsiyasi;

 

—“Olimpiya rekordchilarini tarbiyalagan federatsiya” – O‘zbekiston og‘ir atletika federatsiyasi;

 

 —“Olimpiya o‘yinlarida eng ko‘p medalga ega chiqqan sportchi” – Rishod Sobirov;

 

—“30 yillikning eng sovrindor murabbiyi” – Marat Qurbonov;

 

—“30 yillikda uzluksiz medallarni qo‘lga kiritgan assotsiatsiya” – O‘zbekiston sport kurashlari assotsiatsiyasi;

 

—“O‘zbek sportini dunyoga targ‘ib qilishdagi xizmatlari uchun” – Ravshan Irmatov;

 

—“30 yillikning Eng shonli terma jamoasi” – futbol bo‘yicha 1994 yilgi O‘zbekiston milliy terma jamoasi;

 

—“Yozgi Olimpiya o‘yinlaridagi birinchi medal” – Armen Bagdasarov;

 

—“O‘zbekistonning eng yosh Olimpiya o‘yinlari chempioni” – Ulug‘bek Rashitov.

 

Kechaning eng qiziqarli nominatsiyalaridan 10 yilliklar kesimida O‘zbekistonning eng yaxshi sportchilari eʼlon qilindi. Mukofotlarni OOK bosh direktori, Xalqaro suzish federatsiyasi (FINA) prezidenti Husayn Al Musallam hamda OOK vitse-prezidenti Otabek Umarov topshirdi.

 

G‘oliblar:

 

1.Mirjalol Qosimov (1991-2001)

 

2.Abdullo Tangriyev (2001-2011)

 

3.Oksana Chusovitina (2011-2021).

 

Jamshidbek Amirov