Shimoliy Koreya uchta ballistik raketa uchirdi
Taxmin qilinishicha, Pxenyan yadro sinovini o‘tkazishga tayyorlanmoqda.
Shimoliy Koreya uchta ballistik raketa uchirdi. Parvozlarning maksimal balandligi taxminan 100 km bo‘lgan. Bu haqda Yaponiya mudofaa vaziri Nobuo Kishi ma’lum qildi.
“Shimoliy Koreya sharqiy yo‘nalishda uchta ballistik raketani uchirdi. Ular taxminan 350 km masofani bosib o‘tgan va Yaponiyaning eksklyuziv iqtisodiy zonasidan tashqariga tushgan”, — dedi vazir.
Uning ta’kidlashicha, KXDRning bunday harakatlari Yaponiya va butun xalqaro hamjamiyat tinchligi va xavfsizligiga tahdid soladi.
“Shu munosabat bilan biz Pekindagi elchixona orqali norozilik bildirdik”, — deya qo‘shimcha qilgan u.
Eslatib o‘tamiz, yil boshidan beri Pxenyan o‘ndan ortiq raketa sinovlarini o‘tkazdi. Shuningdek, Shimoliy Koreyada so‘nggi besh yil ichida ilk bor yadro sinovini o‘tkazishga hozirlik ko‘rilayotgani ma’lum qilindi.
