Prezidentga hokim haydovchisi va maktab “zamdirektor”i usta-hunarmand deb tanishtirildi

 

Shavkat Mirziyoyev Farg‘ona viloyatiga tashrifi davomida unga usta-hunarmand shogird sifatida tanishtirilganlar hokim yordamchisi va maktab direktori o‘rinbosari bo‘lib chiqdi.

 

Ijtimoiy tarmoqlar davlat rahbarining Furqat tumanidagi “Usta Yusufjon naqqosh” oilaviy korxonasida bo‘lganida olingan suratda prezidentning orqasida turgan o‘ymakor shogird libosidagi odam tuman hokimining haydovchisi hamda prezident bilan muloqot qilgan yana bir usta tumandagi 21-maktab direktori o‘rinbosari ekani haqida xabarlar tarqaldi.

Farg‘ona viloyati hokimligi mazkur xabarlar bilan to‘ldi.

 

Haqiqatdan ham suratdagi shaxsning Furqat tuman hokimining haydovchisi Ilhom Ahmadjonov ekani, shuningdek, u O‘zbekiston xalq ustasi Muhammadali Yunusovning shogirdlaridan biri bo‘lganligi maʼlum bo‘ldi. Hokim haydovchisi “Usta Yusufjon naqqosh” oilaviy korxonasida shogird sifatida faoliyat olib borgan.

 

 

“Ilhom Ahmadjonov avvaldan o‘zida o‘ymakorlikka, duradgorlikka qiziqish borligi sabab, tumanga kelgach “Usta Yusufjon naqqosh” oilaviy korxonasida milliy yog‘och o‘ymakorligi sanʼati o‘rganish imkoniyati mavjudligidan foydalanib, shogird sifatida hunar sirlarini o‘rgana boshlagan. Kechagi tashrifda ham korxonada doimiy faoliyat olib borayotgan ustalardan tashqari Hunarmandlar maktabining qator o‘rganuvchilari ham bo‘lishganini eʼtiborga olganda, Ilhom Ahmadjonovning ham ular qatorida u yerda bo‘lishi tabiiy holatdir”, - deyiladi xabarda.

 

Davlat rahbari bilan muloqot qilgan Ilhomjon Sulaymonov, faoliyati davomida maktabda mehnat fanidan o‘qituvchi bo‘lgani, o‘quvchilarga duradgorlik va o‘ymakorlik bo‘yicha saboq berganini aytib o‘tgan.

U hozirda tumandagi 21-maktabda maʼnaviy-maʼrifiy ishlar bo‘yicha 0,75 stavkada direktor o‘rinbosari lavozimida ishlab keladi. Uzoq yillardan beri amaliy o‘ymakorlik bilan shug‘ullangan “zamdirektor” “Usta Yusufjon naqqosh” oilaviy korxonasida tushdan keyin shogirdlariga hunarmandlik sirlarini o‘rgatadi.