Minglab odamlar uyiga qaytishi mumkin: Rossiya va Ukraina mahbus almashinuvini tayyorlamoqda
Bu urush boshlanganidan beri eng yirik mahbus almashinuvi bo'lishi mumkinligi ta'kidlandi.
AQSh prezidentining maxsus elchisi Jared Kushner Rossiya va Ukraina o‘rtasida harbiy mojaro boshlanganidan buyon eng yirik mahbus almashinuviga tayyorgarlik ko‘rilayotganini ma’lum qildi. Uning aytishicha, bu jarayon minglab odamlarning o‘z oilalariga qaytishiga imkon berishi mumkin.
“Umid qilamizki, ikkala tomon ham ushbu muhim qadamni amalga oshirish uchun zarur bo‘lgan xayrixohlik va jiddiy niyatlarni namoyish etadi”, deb yozgan Kushner X ijtimoiy tarmog‘ida.
Ushbu bayonot Rossiya va Ukraina o‘rtasidagi bir necha kunlik muzokaralardan so‘ng yangragan. Muloqotlarda AQSh nomidan Jared Kushner va maxsus elchi Stiv Uitkoff ishtirok etgan. 12-noyabr kuni ular Rossiya prezidenti Vladimir Putin bilan Kremlda uchrashgan. Shuningdek, amerikalik vakillar Ukraina prezidenti Vladimir Zelenskiy bilan ham muzokaralar o‘tkazgan.
Kushnerning ta’kidlashicha, tomonlar o‘rtasida sezilarli kelishmovchiliklar saqlanib qolayotgan bo‘lsa-da, muzokaralarda muayyan yutuqlarga erishilgan. Uning so‘zlariga ko‘ra, tomonlarning xavotirlarini tushunish, ehtimoliy yechimlarni aniqlash va keyingi qadamlarni belgilash bo‘yicha ishlar olib borilmoqda.
12-noyabr kuni Kremlda bo‘lib o‘tgan Putin, Uitkoff va Kushner uchrashuvi ikki soatdan ortiq davom etgan. Rossiya prezidenti amerikalik vakillardan AQSh prezidenti Donald Trampga Moskva va Kiyev o‘rtasidagi aloqalarni yo‘lga qo‘yishga ko‘maklashayotgani uchun minnatdorlik bildirishni so‘ragan. Shuningdek, Putin Ukrainadagi ayrim gumanitar masalalarda natijalarga erishilganini qayd etgan.
Hozircha mahbus almashinuvining aniq sanasi, ishtirokchilar soni va boshqa tafsilotlari ochiqlanmagan.
