Xorazmda bezorilar guruhi ushlandi
Ular o‘zga shaxslarni urib-do‘pposlab kelishgan.
Xorazm viloyatida jamiyatda yurish-turish qoidalarini qasddan mensimasdan, o‘zga shaxslarni urish-do‘pposlash kabi jinoyatlarni sodir qilib kelgan bezorilar guruhi qo‘lga olindi. Bu haqda viloyat IIB axborot xizmati xabar berdi.
Aniqlanishicha, mazkur guruhga Urganch shahrida yashovchi, 1986-yilda tug‘ilgan va muqaddam sudlangan S.X. boshchilik qilgan.
Hozirda O‘zbekiston Respublikasi Jinoyat kodeksining 277-moddasi 3-qismi bilan qo‘zg‘atilgan jinoyat ishi doirasida S.X. bilan birgalikda Urganch shahrida yashovchi, 1992-yilda tug‘ilgan B.E. va Urganch tumanida yashovchi, 1986-yilda tug‘ilgan O.M. ham gumonlanuvchi tariqasida jalb etilib, prosessual tartibda ushlangan.
Gumonlanuvchilarga tegishli avtomashinalardan urish va tan jarohati yetkazishda foydalaniladigan pichoq, temir bita ashyoviy dalil tariqasida olingan.
“Tergov harakati davomida ushbu shaxslar tomonidan ilgari sodir qilingan jinoyatlarni va ularning boshqa jinoiy sheriklarini aniqlashga ham e’tibor qaratiladi”, — deyiladi xabarda.
