Shimoliy Koreyada koronavirusga qarshi kurashda dori-darmon tanqisligi vujudga keldi
Aholiga OAV orqali tabobatdan foydalanish tavsiya etilmoqda.
Shimoliy Koreyada COVID-19 infeksiyasi tarqalishi ortidan dori-darmonlar tanqisligi vujudga kelgani xabar qilindi.
Qayd etilishicha, dori-darmonlar dorixonalarga o‘z vaqtida yetib kelmayotgani ta’kidlangan. Bunda Vazirlar Mahkamasi va sog‘liqni saqlash tizimi mutasaddilari ayblangan.
Avvalroq Shimoliy Koreya hukumati dori-darmonlarni davlat zaxirasidan ajratish, shuningdek, dorixonalarni kechayu-kunduz ishlashga o‘tkazishni buyurgan edi. Dori-darmonlar tanqisligi fonida davlat ommaviy axborot vositalari odamlarga xalq tabobati yordamida davolanishni taklif qildi. Shuningdek, Janubiy Koreya prezidenti shimoliy qo‘shnisiga yordam berishga tayyorligini bildirgan.
“Agar Shimoliy Koreya javob bersa, biz ular uchun hech qanday dori-darmon, jumladan, COVID-19 ga qarshi vaksinalarni ham ayamaymiz. Shuningdek, tibbiy asbob-uskunalar va tibbiyot xodimlarini yuborishga tayyormiz”,— degan Janubiy Koreya Prezidenti.
Hozircha bu bo‘yicha Pxenyandan hech qanday javob kelmagan.
