Yangi o‘quv yilidan maktab formasi to‘liq joriy etiladi
Kam ta’minlangan oila farzandlariga forma sotib olishda yordam beriladi.
Vazirlar Mahkamasining 19 may kungi qaroriga ko‘ra, 2022/2023 o‘quv yilidan davlat maktablarida o‘quvchilar uchun maktab formasi to‘liq joriy etiladi. Bu haqda Adliya vazirligining “Huquqiy axborot” telegram-kanalida ma’lum qilindi.
Qayd etilishicha, 2022 yil 1 iyungacha hududlar kesimida yangi o‘quv yilida maktab formalariga ehtiyoj aniqlanadi. Kam ta’minlangan oilalar farzandlari uchun maktab formasi mahalliy byudjet hamda “Temir daftar”, “Ayollar daftari” va “Yoshlar daftari” jamg‘armalari mablag‘lari hisobidan sotib olinishida ko‘maklashiladi.
Shuningdek, 2022 yil 10 avgustdan har bir tuman (shahar)da maktab formasi ishlab chiquvchilarning savdo shoxobchalari tashkil etiladi.
Eslatib o‘tamiz, davlat maktablari o‘quvchilari uchun yagona maktab formasi shakllari Hukumatning 15.08.2015 yildagi 666-son qarori bilan tasdiqlangan.
