Rossiya Finlandiyaga gaz yetkazishni to‘xtatdi
Bu qaror mamlakatning gaz uchun rublda to‘lov qilishni rad etgani bilan izohlanmoqda.
Rossiyaning “Gazprom” kompaniyasi Finlandiyaga gaz yetkazib berishni to‘xtatganini ma’lum qildi. Bu qaror Finlandiyaning gaz uchun to‘lovni rublda amalga oshirishni rad etishi bilan izohlanmoqda.
Qayd etilishicha, “Gazprom Export” 2021-yilda “Gasum” kompaniyasiga 1,49 milliard kub metr gaz yetkazib bergan, bu Finlandiyadagi umumiy gaz iste’molining uchdan ikki qismini tashkil qilgan.
Gaz yetkazib berish to‘xtatilganini “Gasum” kompaniyasi ham tasdiqladi. 2022-yil yoz mavsumida Finlandiya operatori o‘z mijozlarini boshqa manbalardan, ya’ni Estoniyadan “Balticconnector” quvuri orqali gaz bilan ta’minlaydi.
Avvalroq Finlyandiya bosh vaziri Sanna Marin mamlakat Rossiya tabiiy gazi va neftini tezda to‘xtatishga tayyorligini aytgan edi. Shuningdek, Finlandiya mart oyida Rossiyadan neft importini 70 foizga qisqartirgani xabar qilingan.
