Yevropa aholisi kamayib bormoqda
Rasmiy ma’lumotlarga ko‘ra, pandemiya Yevropa Ittifoqida 1,09 millionga yaqin odamni hayotdan olib ketgan.
Yevrostat ma’lumotlariga ko‘ra, 2021 yil 1 yanvar holatiga ko‘ra, Yevropa Ittifoqining 27 ta davlatida istiqomat qiluvchilar soni 12 oy ichida 278 ming kishiga kamayib, 447,2 million kishini tashkil qilgan.
2001 yilda Ittifoqda 429 million kishi yashagan. Aholining tabiiy o‘sishi, ya’ni tug‘ilish va o‘lim o‘rtasidagi farq 2020 yilda -2,5 gacha kamaydi. Bunga COVID-19 sabab bo‘lishi mumkin.
Hozirda 65 yoshdan oshganlar Yevropa Ittifoqi aholisining beshdan bir qismini tashkil qiladi. 80 va undan katta yoshdagilar soni so‘nggi 20 yil ichida ikki baravar - 2001 yildagi 3 foizdan 6 foizgacha ko‘paydi.
Shu bilan birga, 20 yoshgacha bo‘lganlar soni 2001 yildagi 23 foizdan 2021 yilda 20 foizga kamaydi. Yevrostat ma’lumotlari, shuningdek, ayollar erkaklardan taxminan 5% ko‘proq ekanligini va bu nisbat, ayniqsa Boltiqbo‘yi davlatlarida notekis ekanligini ko‘rsatadi. Latviya, Litva va Estoniyada ayollar erkaklardan mos ravishda 16%, 13% va 10% ga ko‘proq. Biroq, erkaklar ayollardan ko‘ra ko‘proq mamlakatlar ham bor. Bular Malta, Lyuksemburg, Shvesiya va Sloveniyadir.
