Shimoliy Koreya 8 ta ballistik raketa uchirdi
Buning ortidan Yaponiya Pxenyanga norozilik bildirishnomasi yuborgan.
Bugun, 5-iyun kuni Shimoliy Koreya Yapon dengizi tomon sakkizta qisqa masofali ballistik raketa uchirdi. Bu haqda Janubiy Koreya harbiylariga tayanib, “Yonhap” agentligi xabar bermoqda.
Qayd etilishicha, raketalar mahalliy vaqt bilan soat 09:08 da Pxenyan yaqinidagi Sunan aeroporti hududidan va boshqa joylardan uchirilgan. Ularning qayerga tushgani hozircha noma’lum.
Yaponiya mudofaa vazirligi ma’lumotlariga ko‘ra, snaryadlar 300–400 km masofagacha uchib, 50–100 km balandlikka ko‘tarilgan. Raketalar uchirilishi munosabati bilan Tokio Pxenyanga norozilik bildirishnomasini yuborgan.
Eslatib o‘tamiz, bu joriy yil boshidan beri amalga oshirilgan 18-raketa sinovi hisoblanadi. Oxirgi marta Shimoliy Koreya 25-may kuni uchta ballistik raketa uchirgandi. Ularning bittasi qit’alararo raketa bo‘lgan.
Javohirbek TURSUNOV
