Xorazmda Milliy gvardiya xodimlari bozorchilarga kuch ishlatgani aytildi

 

Ijtimoiy tarmoqda Xorazm viloyati Urganch dexqon bozorida 4 iyun kuni Milliy gvardiya xodimlari ona va qizga kuch ishlatib, urib olib ketgani haqida videolavha tarqaldi. Holat yuzasidan shahar hokimligi rasmiy munosabat bildirdi. 

Aniqlanishicha, shu kuni dexqon bozori yonidagi 5 blok savdo rastalari oldida fuqaro M. R. va A. J. lar o‘rtasida janjal yuzaga kelgan. Uni eshitgan Milliy gvardiya harbiy xizmatchilari tezda voqea joyiga yetib borgan. Milliy gvardiya xizmatchilari janjalni oldini olib, fuqaro M. R. ni voqea joyidan ketkazayotganda fuqaro A. J. va uning opasi R. J. larning jahli chiqqan va xodimlarga baqirib, ularni haqorat qilgan.

Shundan so‘ng ushbu fuqarolarni tinchlantirish maqsadida bozor hududidagi 16-sonli tayanch punktiga olib kelingan. Bu yerda o‘ziga nisbatan kuch ishlatilganidan norozi bo‘lgan fuqarolar A. J. va R. J. lar Milliy gvardiya harbiy xizmatchilariga faol qarshilik ko‘rsatib, shovqin ko‘targan va holatni o‘zlarining qo‘l telefoniga tasvirga olib, internet ijtimoiy tarmoqlariga tarqatgan. 

Dastdabki tekshiruv ma’lumotlariga ko‘ra, ushbu fuqarolarga Milliy gvardiya harbiy xizmatchilari tomonidan tan jarohati yetkazish holatlari aniqlanmagan.

Hozirda mazkur holat yuzasidan Milliy gvardiya Xorazm viloyati bo‘yicha boshqarmasi xodimlari tomonidan tergovga qadar tekshiruv ishlari olib borilmoqda.