Jizzaxdagi “gaz zapravka”da portlash sodir bo‘ldi
Holat bo‘yicha viloyat FVB ma’lumot berdi.
Jizzax viloyatining Sharof Rashidov tumanida 23-iyun kuni avtomobillarga gaz to‘ldirish shoxobchasida portlash yuz berdi. Bu haqda viloyat Favqulodda vaziyatlar boshqarmasi Matbuot xizmati ma’lum qildi.
Qayd etilishicha, kecha soat 15:00 atrofida Sharof Rashidov tumani “Sovungarlik” MFY hududida joylashgan avtomobillarni gaz bilan to‘ldirish kompressor stansiyasida “VAZ-2106” rusumli transport vositasiga yonilg‘i to‘ldirish jarayonida portlash sodir bo‘lgan.
“Hodisa oqibatida hech kim jabrlanmagan, boshqa transport vositalariga zarar yetmagan. Jabrlanganlar yo‘q. Portlash natijasida yong‘in kelib chiqmagan, yong‘in-qutqaruv bo‘linmalari hodisa joyiga chiqarilmagan”, — deyiladi xabarda.
Dastlabki ma’lumotlarga ko‘ra, hodisaga “VAZ-2106” avtomashinasidagi nosozlik sabab bo‘lgan. Hozirda surishtiruv ishlari davom etmoqda.
Eslatib o‘tamiz, bundan oldin Toshkent viloyatining Olmaliq shahridagi korxonada kuchli portlash ro‘y bergandi. Oqibatda sexning bino konstruksiyalari buzilgan.
