Zangiota shifoxonasi shunchaki kelib, koronavirusga test topshirib ketadigan muassasa emas—mutaxassis
Shifoxona xodimlari fuqarolarda kasallik alomati sezilsa, o‘z hududidagi tibbiyot punktiga murojaat qilishini aytmoqda.
Ijtimoiy tarmoqda so‘nggi kunlarda Zangiota yukumli kasalliklar shifoxonasida koronavirusga chalingan bemorlar soni keskin ortgani haqida xabarlar tarqalmoqda. Mutaxassilar kasalxonadagi vaziyat bo‘yicha ma’lumot berdi.
Aayni paytda 4000 o‘ringa mo‘ljallangan Zangiota 1 va 2-son yuqumli kasalliklar shifoxonasida koronavirus tashxisi qo‘yilgan va kasallikka gumonlangan 900 nafarga yaqin bemor davolanmoqda. 93 nafar bemor esa jonlantirish bo‘limida davo muolajalarini olyapti. Kasallanishlar soni oshgan bo‘lsa-da, bugun shifoxonaga yotqizilayotgan aksariyat bemorlarda o‘pka zararlanishi, saturasiyaning pasayishi kabi jiddiy asoratlar kuzatilayotgani yo‘q.
“O‘tgan yilning shu davri bilan taqqoslasak, bemorlar soni juda past. Ayni paytda muassasamizga murojaat qilayotgan va gospitalizasiyaga ko‘rsatma bo‘lgan bemorlarning barchasi shifoxonaga yotqizilib, ularga zarur tibbiy yordam ko‘rsatilmoqda. Markazimiz yetarli darajada tibbiy anjom va dori vositalari bilan ta’minlangan”, — deydi shifoxona direktori o‘rinbosari Hilola Alimova.
Mutaxassis fuqarolardan o‘zlarida kasallik alomatlarini sezsa, Zangiota yuqumli kasalliklar shifoxonasiga emas, avvalo, yashash hududidagi oilaviy poliklinika yoki oilaviy shifokor punktiga hamda Sanitariya epidemiologiya osoyishtalik va jamoat salomatligi xizmatining tuman bo‘limlariga murojat qilishini iltimos qilgan.
“Sababi shifoxonamiz koronavirusga test topshiradigan yoki tana haroratini o‘lchaydigan muassasa emas. Balki COVID-19ga chalingan va xastalik og‘ir hamda o‘ta og‘ir kechayotgan bemorlar davolanishi uchun mo‘ljallangan shifo maskanidir”, — deydi u.
