Isroil parlamenti o‘zini tarqatib yuborishga ovoz berdi
Bosh vazir Naftali Bennet siyosatni tark etmoqchi.
Isroil parlamenti (Knesset) 30-iyun o‘zini-o‘zi tarqatib yuborish uchun ovoz berdi. Bu haqda “The Jerusalem Post” nashri xabar bermoqda.
Qayd etilishicha, navbatdagi parlament saylovlari 2022-yil 1-noyabrda bo‘lib o‘tadi. Bu so‘nggi uch yildagi beshinchi saylov hisoblanadi. Ungacha esa tashqi ishlar vaziri Yair Lapid bosh vazir vazifasini bajaruvchi lavozimida ishlaydi.
Ovoz berish kecha bo‘lib o‘tishi kerak edi, biroq koalisiya va muxolifat saylov sanasi borasida kelisha olmadi. Muxolifatdagi parlamentariylar saylovni 25-oktyabrda o‘tkazishni talab qilgan. Partiya ro‘yxatlari 15-sentyabrgacha topshirilishi kerak.
29-iyun, chorshanba kuni Isroil bosh vaziri Naftali Bennet siyosatni tark etishi va yangi parlament saylovlarida ishtirok etmasligini ma’lum qildi.'
