Ukraina nizosi yakunlari bo‘yicha uchta variant taxmin qilindi
AQSH diplomati bu bo‘yicha fikrlarini keltirdi.
AQSH sobiq davlat kotibi Genri Kissinjer Ukraina nizosi yakuni bo‘yicha 3 variantni keltirdi. Bu haqda u The Spectator jurnaliga bergan intervyusida aytgan.
Diplomatning fikricha, birinchi holatda Moskva hozirgi pozitsiyalarida to‘xtaydi. Natijada Ukraina 20 foiz hududini yo‘qotadi va Donbassning katta qismi, asosiy sanoat hamda qishloq xo‘jalik mintaqasi, shuningdek, Qora dengiz qirg‘og‘ining bir qismi Rossiya nazoratiga o‘tadi. Kissinjer bu RF g‘alabasi bo‘lishini taʼkidlagan. NATO ham ushbu vaziyatda nizoga tortilmaydi.
Ikkinchi variant — Rossiyani egallab olingan hududlardan siqib chiqishga urinish. Ammo nizo cho‘zilib borishi bilan G‘arb ham unga qo‘shilishi xavfi bor.
“Uchinchi variant — 24 fevraldagi vaziyatga qaytish. Bu holatda Ukraina qayta qurollanadi va NATO bilan qattiq bog‘lanadi, u hatto alyans aʼzosiga aylanishi mumkin. Bu mojaroning maʼlum muddatga muzlatilishiga olib keladi”, — degan sobiq davlat kotibi.
Maʼlumot o‘rnida: Genri Kissinjer 1969-1975 yillarda AQSH prezidentining milliy xavfsizlik bo‘yicha maslahatchisi, 1973-77 yillarda esa davlat kotibi bo‘lgan. Uni “AQSH diplomatiyasi oqsoqoli” deb atashadi. Diplomat, shuningdek, xalqaro munosabatlar sohasida dunyoning eng yetakchi ekspertlaridan biri.
Avvalroq Vladimir Zelenskiy Rossiyaning Ukraina bilan chegaralanib qolmasligini maʼlum qilgandi.
