Avtomashina egasi o‘zgarsa, “tonirovka” ruxsatnomasining amal qilish muddati saqlanib qoladimi?
Bu bo‘yicha IIV tomonidan yangi tartib joriy qilinadi.
Joriy yilning 1-sentyabrigacha Ichki ishlar vazirligi tomonidan “tonirovka” qilingan transport egasi o‘zgarganda, davlat raqami almashtirilganda yoki egasining ma’lumotlarida o‘zgarish bo‘lganda “tonirovka” uchun berilgan ruxsatnomaning amal qilish muddatini saqlab qolish tartibi ishlab chiqiladi. Bu O‘zbekiston Respublikasi Prezidentining “Avtotransport vositalaridan foydalanishda aholiga qo‘shimcha qulayliklar yaratish chora-tadbirlari to‘g‘risida”gi Qarorida ko‘rsatib o‘tilgan.
Eslatib o‘tamiz, 2022-yil 1-iyuldan yengil avtotransport vositalarining orqa yon oynalarini qoraytirish bepul amalga oshiriladi.
Old yon oynalari tusini qoraytirishga ruxsatnoma berganlik uchun BHMning 8 baravari (2 mln 400 ming so‘m) miqdorida to‘lov undiriladi. Ushbu davlat xizmati YAIDXP orqali ko‘rsatilganda to‘lov miqdori 2 mln 160 ming so‘mni tashkil etadi.
