Turkmaniston Prezidenti Faxriy mehmonlar xiyoboniga daraxt ekdi
Avvalroq Serdar Berdimuhamedov “Ko‘ksaroy” qarorgohida rasmiy kutib olingandi.
Turkmaniston Prezidenti Serdar Berdimuhamedov O‘zbekistonga davlat tashrifining birinchi kuni yakunida Prezident Shavkat Mirziyoyev huzurida “Ko‘ksaroy” qarorgohining Faxriy mehmonlar xiyobonida daraxt ekdi. Bu haqda Prezident matbuot xizmati xabar berdi.
“Ushbu ezgu an’ana yaqin yillarda mamlakatlarimiz o‘rtasidagi ko‘p qirrali hamkorlikni va strategik sheriklikni kengaytirish uchun poydevor bo‘ladigan oliy darajadagi muzokaralarning sermahsul natijalarini mustahkamlaydi.
Turkmaniston rahbari tomonidan ekilgan daraxt xalqlarimiz o‘rtasidagi do‘stlik va yaxshi qo‘shnichilik rishtalari buzilmas ekanining ramzlaridan biri bo‘lib xizmat qiladi”, — deyiladi xabarda.
