Shavkat Mirziyoyev Finlyandiya prezidenti bilan uchrashdi
Uchrashuvda tomonlar o'rtasidagi metallurgiya, energetika, geologiya, ekologiya hamda suv resurslari sohalaridagi hamkorlikni kengaytirish masalalarini ko‘rib chiqildi.
Antaliya shahrida bo‘lib o‘tayotgan BMTning Iqlim o‘zgarishi bo‘yicha 31-konferensiyasi doirasida Shavkat Mirziyoyev Finlyandiya Prezidenti Aleksandr Stubb bilan uchrashuv o‘tkazdi.
Muloqotda ikki tomonlama hamkorlikni yanada rivojlantirish, shuningdek, Aleksandr Stubbning o‘tgan yili O‘zbekistonga amalga oshirgan rasmiy tashrifi davomida erishilgan kelishuvlarni hayotga tatbiq etish masalalari muhokama qilindi.
Xususan, o‘zaro savdo hajmini oshirish, metallurgiya, energetika va geologiya sohalaridagi qo‘shma loyihalarni jadallashtirishga alohida e’tibor qaratildi. Shuningdek, ekologiya va suv resurslarini boshqarish yo‘nalishlarida hamkorlikni kengaytirish masalalari ko‘rib chiqildi.
Uchrashuvda 2027-yil boshida Hukumatlararo komissiyaning navbatdagi yig‘ilishi hamda ikki mamlakat ishbilarmon doiralari ishtirokida biznes forum o‘tkazish muhimligi ta’kidlandi.
Tomonlar mintaqaviy va xalqaro ahamiyatga molik dolzarb masalalar yuzasidan ham fikr almashdi.
