Shavkat Mirziyoyev Turkiy davlatlar tashkilotining yangi bosh kotibini qabul qildi
Tomonlar 2027-yilda O‘zbekistonda o‘tkazilishi rejalashtirilgan TDT sammitiga tayyorgarlik masalalarini ko‘rib chiqdi.
Shavkat Mirziyoyev Turkiyaga amaliy tashrifi doirasida Turkiy davlatlar tashkilotining yangi tayinlangan bosh kotibi Mirvohid Azimovni qabul qildi.
Uchrashuvda 11-noyabrdan o‘z lavozimiga kirishayotgan bosh kotib oldida turgan ustuvor vazifalar, O‘zbekiston va tashkilot o‘rtasidagi ko‘p qirrali hamkorlikning bugungi holati hamda uni yanada rivojlantirish istiqbollari yuzasidan fikr almashildi.
Shuningdek, 2027-yilda O‘zbekistonda o‘tkazilishi rejalashtirilgan Turkiy davlatlar tashkiloti sammitiga tayyorgarlik masalalari muhokama qilindi. Uni yuqori tashkiliy saviyada va mazmunli o‘tkazish muhimligi ta’kidlandi.
Uchrashuv yakunida davlat rahbari Mirvohid Azimovni mas’uliyatli lavozimga tayinlangani bilan tabriklab, unga TDT bosh kotibi sifatidagi faoliyatida muvaffaqiyat va samarali natijalar tiladi.
