Sun’iy intellekt xavfsizlikka tahdid solmasligi kerak: Shavkat Mirziyoyev xalqaro tashabbuslarni ilgari surdi
O‘zbekiston Prezidenti Ostonada Aqaba jarayoni doirasidagi Markaziy Osiyo yetakchilari uchrashuvida qatnashdi.
6-noyabr kuni Ostona shahrida Aqaba jarayoni doirasida Markaziy Osiyo davlatlari rahbarlarining sun’iy intellekt sohasidagi xavfsizlik masalalariga bag‘ishlangan uchrashuvi bo‘lib o‘tdi. Unda Shavkat Mirziyoyev ham ishtirok etdi.
Tadbirda Qozog‘iston Prezidenti Qasim-Jomart Toqayev, Tojikiston Prezidenti Emomali Rahmon, Turkmaniston Prezidenti Serdar Berdimuhamedov, Iordaniya qiroli Abdulla II, shuningdek, Ozarbayjon va Qirg‘izistonning yuqori darajali vakillari hamda boshqa xorijiy mehmonlar qatnashdi.
Uchrashuvda xalqaro va mintaqaviy xavfsizlikni ta’minlash, terrorizm va ekstremizmga qarshi kurashish, raqamli texnologiyalar rivoji bilan bog‘liq yangi xavf-xatarlar muhokama qilindi. Davlatlar o‘rtasidagi amaliy hamkorlikni kengaytirish, tajriba almashish va, ayniqsa, yoshlar orasida radikallashuvning oldini olish mexanizmlarini takomillashtirishga alohida e’tibor qaratildi.
Shavkat Mirziyoyev o‘z nutqida xavfsizlik va barqarorlikka tahdidlar kuchayib borayotgan sharoitda Aqaba jarayonining ahamiyatini yuqori baholadi.
Sun’iy intellekt jadal rivojlanishi insoniyat uchun katta imkoniyatlar yaratishi bilan birga, yangi tahdidlarni ham yuzaga keltirayotgani qayd etildi. Shu munosabat bilan sifatli ta’limni rivojlantirish va inson salohiyatini to‘liq ro‘yobga chiqarish uchun sharoit yaratish xavfsizlikning muhim poydevori ekani ta’kidlandi.
Prezident “Inson manfaatlari yo‘lida raqamli taraqqiyot” tashabbusini ilgari surdi. U ma’rifat va ilmga intilish an’analarini zamonaviy ilm-fan yutuqlari bilan uyg‘unlashtirish, sun’iy intellekt imkoniyatlarini bilimlarni keng tarqatish, o‘zaro ishonchni mustahkamlash va inson kamolotiga xizmat qildirishni nazarda tutadi.
Shuningdek, BMTning Sun’iy intellektni boshqarish masalalari bo‘yicha global muloqoti qo‘llab-quvvatlandi.
O‘zbekiston global sa’y-harakatlarga amaliy hissa qo‘shish maqsadida mamlakatda BMT Aksilterror boshqarmasining mintaqaviy ofisini ochishga tayyorligini bildirdi. Ushbu ofis Markaziy Osiyo davlatlariga terrorchilik mazmunidagi materiallar haqida ogohlantirish kanallarini yo‘lga qo‘yish, terrorizmni moliyalashtirish holatlarini aniqlash, mutaxassislar malakasini oshirish va bu jarayonlarda sun’iy intellektdan foydalanish bo‘yicha ko‘mak ko‘rsatishi ko‘zda tutilgan.
Bundan tashqari, O‘zbekistondagi Islom sivilizatsiyasi markazi negizida “Raqamli davrda jaholatga qarshi ma’rifat” xalqaro dasturini yo‘lga qo‘yish taklif etildi. Dastur doirasida ko‘p tilli axborot resurslarini yaratish, diniy arboblarni axborot muhitida faoliyat yuritishga tayyorlash hamda islom dinining insonparvarlik qadriyatlarini targ‘ib qilayotgan yosh tadqiqotchilarni qo‘llab-quvvatlash rejalashtirilgan.
Davlat rahbari sun’iy intellektning kelajagi nafaqat texnologik taraqqiyotga, balki undan qanday maqsadlarda foydalanishga ham bog‘liqligini ta’kidladi. Yangi texnologiyalarni tahdid manbaiga emas, balki tinchlik, xavfsizlik va inson taraqqiyotini ta’minlash vositasiga aylantirish zarurligini qayd etdi.
