Xorazmda aliment to‘lamagan ota salkam bir yilga ozodlikdan mahrum qilindi
U 13,3 mln so‘m aliment pullari to‘lashdan qasddan bo‘yin tovlab kelgan.
Jinoyat ishlari bo‘yicha Shovot tuman sudi qarori bilan aliment to‘lamagan qarzdor X. Yu. 9 oy muddatga ozodlikdan mahrum qilindi. Bu haqda Majburiy ijro byurosining rasmiy telegram kanalida xabar berildi.
Qayd etilishicha, sud tomonidan qarzdor X.Yu.dan undiruvchi R. R.ning foydasiga uch nafar voyaga yetmagan farzandlarining moddiy ta’minoti uchun aliment undirish belgilangan.
MIB Shovot tuman bo‘limi xodimlari tomonidan aliment to‘lashi yuzasidan qarzdor bir necha bor ogohlantirilgan bo‘lsa-da, aliment pullarini o‘z vaqtida to‘lamasdan kelganligi sababli sud tomonidan unga nisbatan 15 sutka ma’muriy qamoq jazosi tayinlangan. Shunga qaramasdan fuqaro 13 oy mobaynida 13,3 mln so‘m aliment pullari to‘lashdan qasddan bo‘yin tovlab kelgan.
Shundan so‘ng qarzdorga nisbatan Jinoyat kodeksining 122-moddasi 1-qismi bilan jinoyat ishi qo‘zg‘atilgan va 9 oy muddatga ozodlikdan mahrum qilish jazosi tayinangan.
