Qoraqalpog‘istonda soliq to‘lovchilarga yengillik berildi
Favqulodda holat davrida soliq hisobotlarini taqdim etmagan shaxslarga javobgarlik belgilanmaydi.
Qoraqalpog‘iston Respublikasida favqulodda holat davrida soliq to‘lovchilar uchun yengillik berildi. Bu haqda Davlat soliq qo‘mitasi Matbuot xizmati ma’lum qildi.
Qayd etilishicha, joriy yilning 3-iyulidan 2-avgustiga qadar respublikada favqulodda holat joriy etilganligini inobatga olib, Davlat soliq qo‘mitasi Soliq kodeksining 213-moddasi 1-qismi 2-bandi va 215-moddasi 1-qismi 1-bandlariga asosan ushbu hududda faoliyat yuritayotgan soliq to‘lovchilarga nisbatan favqulodda holat davrida soliq hisobotlarini belgilangan muddatlarda taqdim etmaslik holatlari bo‘yicha javobgarlik va ta’sir choralari (bankdagi hisob raqamlar bo‘yicha operasiyalarni to‘xtatish, QQS guvohnomasini amal qilishini vaqtincha to‘xtatish) qo‘llanilmaydi.
Eslatib o‘tamiz, bundan oldin 2022-yilning so‘nggi uch oyida 44 mingdan ziyod xo‘jalik yurituvchi subektlarga 9 trln so‘mdan ortiq soliq imtiyozlari berilgani xabar qilingandi.
