Tojikiston Prezidenti Shavkat Mirziyoyevni tavallud kuni bilan tabrikladi
O‘zaro suhbatda, shuningdek, hamkorlik masalalari ko‘rib chiqilgan.
Bugun, 24-iyul kuni O‘zbekiston Respublikasi Prezidenti Shavkat Mirziyoyevning Tojikiston Respublikasi Prezidenti Emomali Rahmon bilan telefon orqali muloqoti bo‘lib o‘tdi. Bu haqda Prezident matbuot xizmati xabar berdi.
Suhbat avvalida Tojikiston yetakchisi davlat rahbarini tavallud kuni bilan samimiy tabriklab, tinchlik-osoyishtalik, farovonlik va katta muvaffaqiyatlar tiladi.
Ikki tomonlama kun tartibidagi hamda mintaqaviy hamkorlikning dolzarb masalalari yuzasidan fikr almashildi.
Joriy yil 2-3 iyun kunlari Tojikiston Prezidentining O‘zbekistonga rasmiy tashrifi yakunida erishilgan kelishuvlarni bajarish bo‘yicha “yo‘l xaritasi”ni o‘z vaqtida amalga oshirish muhimligi ta’kidlandi. Eng avvalo energetika sohasidagi kooperasiya loyihalarini jadallashtirishga alohida e’tibor qaratildi.
Shuningdek, sentyabr oyida o‘tkaziladigan Shanxay hamkorlik tashkilotining Samarqand sammitiga tayyorgarlik masalalari muhokama qilindi.
