Diniy oliy ta’lim muassasalariga kirish imtihonlari sanasi ma’lum bo‘ldi
Ijodiy imtihon va test sinovlari 3—12 avgust kunlari o‘tkaziladi.
O‘zbekiston musulmonlari idorasi tasarrufidagi oliy diniy ta’lim muassasalarida 2022-2023-o‘quv yili bo‘yicha qabul imtihonlari ijodiy imtihon va test sinovi shaklida o‘tkazilishi belgilangan. Bu haqda Diniy idoraning Ta’lim va ilmiy-tadqiqodlar bo‘limi xabar berdi.
Hadis ilmi maktabiga kirish imtihonlari 3-avgust kuni Hadis ilmi maktabi binosi sport zalida bo‘lib o‘tadi. Hadis va mustalah al-hadis va arab tilidan ijodiy imtihonlar olinadi. 4-avgust kuni mazkur muassasaning orqa hovli qismida O‘zbekiston tarixi fanidan test o‘tkaziladi va 5-avgustda mandat e’lon qilinadi.
Imom Buxoriy nomidagi Toshkent islom institutiga kirish imtihonlari 8-avgust kuni Toshkent islom instituti binosi ayvon qismida bo‘lib o‘tadi. Unda arab tilidan ijodiy imtihon olinadi. 9-avgust kuni mazkur muassasaning hovlisida Fiqh va aqoiddan test o‘tkaziladi va 10-avgustda mandat e’lon qilinadi.
Mir Arab oliy madrasasiga kirish imtihonlari 11-avgust kuni Mir Arab oliy madrasasi binosi ayvon qismida bo‘lib o‘tadi. Unda arab tilidan ijodiy imtihon olinadi. 12-avgust kuni huddi shu joyda Fiqh va aqoiddan hamda O‘zbekiston tarixi fanidan test o‘tkaziladi. Mandat natijalari 13-avgustda e’lon qilinadi.
Eslatib o‘tamiz, Imom Buxoriy nomidagi Toshkent islom instituti, Mir Arab oliy madrasasi va Hadis ilmi maktabiga o‘rta maxsus islom ta’lim muassasalarini tamomlagan abituriyentlarning hujjatlari qabul qilingan.
O‘zbekiston musulmonlari idorasi tasarrufidagi O‘rta maxsus islom ta’lim muassasalari kirish test sinovlari Davlat test markazi tomonidan o‘tkaziladi. 2022-2023-o‘quv yili uchun test sinovlari kunlari bo‘yicha qo‘shimcha ma’lumot beriladi.
