Shimoliy Koreya yettinchi yadro sinovlariga tayyorlanmoqda — Blinken
Bundan oldin Kim Chen In AQSHga jiddiy ogohlantirish bergandi.
KXDR navbatdagi yadro sinovlariga tayyorgarlik ko‘rmoqda. Bu haqda AQSH davlat kotibi Entoni Blinken ma’lum qildi.
“Biz siz bilan bu yerda ko‘rishib turganimizda, Pxenyan yettinchi yadro sinovlarini o‘tkazishga tayyorlanmoqda”, — degan diplomat BMTning yadro qurolini tarqatmaslik bo‘yicha shartnomasi konferensiyasida.
Iyun oxirida Janubiy Koreya shtab boshliqlari birlashgan qo‘mitasi KXDRning yadro sinovlari uchun barcha tayyorgarlik ishlarini yakunlaganini ma’lum qilgandi. Ammo uning aniq o‘tkazilish sanasi bo‘yicha yakuniy kelishuvga erishilmagan.
Avvalroq Yaponiya mudofaa vazirligi Shimoliy Koreyaning raketa tizimlari kuchaytirilayotgani to‘g‘risida ma’lumot bergandi. Shuningdek, Kim Chen In AQSH bilan har qanday to‘qnashuvga tayyor ekanini aytgandi.
