O‘zbekiston va Ozarbayjon ishlab chiqaruvchilari ko‘rgazmasi o‘tkaziladi
Ikki davlat o‘rtasida savdo-iqtisodiy hamkorlik va sanoat kooperatsiyasini chuqurlashtirish bo‘yicha kelishuvga erishildi.
O‘zbekiston va Ozarbayjon qo‘shma investitsiya jamg‘armasi tashkil etish, zargarlik fabrikasi va ipak ishlab chiqarish klasteri qurishga kelishib oldi. Bu haqda O‘zbekistonda amaliy tashrif bilan bo‘lgan Ozarbayjon Iqtisodiyot vaziri Mikayil Jabborov va investitsiyalar va tashqi savdo vaziri Jamshid Xo‘jayevning muzokaralari yakunlarida maʼlum qilindi.
Xuchusan, investitsiyaviy hamkorlik va sanoat kooperatsiyasi muhokamasi doirasida Bard shahri yaqinidagi 6 ta tumanda klasterini tashkil qilib, ipak ishlab chiqarishni yo‘lga qo‘yish, Yevlax pilot agroparki va Agdam sanoat parkida yangi loyihalarni ishlab chiqish bo‘yicha qator masalalar kelishib olindi. Shu bilan birga, Toshkent shahrida zargarlik buyumlari ishlab chiqarish bo‘yicha qo‘shma korxona tashkil etish, kimyo sanoati, energetika, neft va gaz sohalarida hamkorlikni rivojlantirish kabi qo‘shma loyihalarni amalga oshirish masalalariga alohida to‘xtalib o‘tildi.
Mazkur yo‘nalishdagi amaliy tadbirlarni muhokama qilish jarayonida tomonlar joriy yilning noyabr oyida Toshkentda hududlarning birinchi forumini, shuningdek, O‘zbekiston va Ozarbayjonning turli viloyatlaridagi ishlab chiqaruvchilar ko‘rgazmasini tashkil etishga kelishdilar.
Uchrashuv yakunida ikki tomonlama hujjatlar to‘plamini imzolash marosimi bo‘lib o‘tdi.
