AQSHning Indiana shtatida kuchli portlash ro‘y berdi
Oqibatda 3 kishi halok bo‘lgani aytilmoqda.
AQSHning Indiana shtatidagi Evansvill shahrida turar-joy binosi portladi. Bu haqda USA Today nashri xabar berdi.
Portlash oqibatida 3 kishi halok bo‘lgan. Rasmiylar uy joylashgan ko‘cha vayronalarga to‘lib ketgani, qo‘shni binolar jiddiy shikastlanganini taʼkidlamoqda. Barcha yong‘inlar o‘chirilgan. Portlash sodir bo‘lgan hududda elektr taʼminotida uzilishlar mavjud. Politsiya voqea joyidan yaqin atrofdagi ko‘chalarni to‘sib qo‘ygani aytilmoqda.
Evansvill o‘t o‘chirish xizmati boshlig‘i Mayk Konneli xabariga ko‘ra, portlash radiusi 30 metrdan oshib, 40 ga yaqin uyga zarar yetkazgan, shundan 11 ta bino esa yashash uchun yaroqsiz deb topilgan.
Vanderburg okrugi rasmiylari uch kishi halok bo‘lganini tasdiqladi, N.Vaynbax prospektidagi portlash qurbonlarini qidirish davom etmoqda.
Ayni damda voqea joyida Federal byuro tomonidan spirtli ichimliklar, tamaki, o‘qotar qurollar va portlovchi moddalar bo‘yicha tergov ishlari olib borilmoqda. Hozircha portlash sabablari aniqlanmagan.
Qizil Xochning mahalliy bo‘limi jabrlanganlarga yordam ko‘rsatib, ularni vaqtinchalik boshpana, oziq-ovqat va suv bilan taʼminlamoqda.
