Navoiydagi parkda yongʻin chiqdi
Hodisa joyiga 2 ta yongʻin-qutqaruv ekipaji jalb qilingan.
Navoiy viloyatining Qiziltepa tumanidagi istirohat bogʻida 11-avgust kuni yongʻin sodir boʻldi. Bu boʻyicha viloyat Favqulodda vaziyatlar boshqarmasi axborot xizmati xabar berdi
Qayd etilishicha, yongʻin Qiziltepa tumani “A.Navoiy” MFY Oʻzbekiston shohkoʻchasida joylashagan “Madaniyat” istirohat bogʻi kirish qismida yuz bergan. Shunga koʻra, 2 ta yongʻin-qutqaruv ekipaji soat 15:18 da voqea joyiga yetib borib, yongʻin soat 15:19 da oʻrab olingan va soat 15:21 da oʻchirilgan.
Hodisa oqibatida istirohat bogʻiga kirish arkasining 3 kvadrat metr maydonida shift qismi yonib zararlangan. Tezkor harakatlar natijasida arkaning 25 kvadrat metr maydoni yongʻindan saqlab qolingan. Hozirda yongʻin sababi va moddiy zarar miqdori aniqlanmoqda.
