Shavkat Mirziyoyev shu hafta Saudiya Arabistoniga boradi
Bu oxirgi 30 yil ichida davlat rahbarining ushbu mamlakatga ilk tashrifi bo‘ladi.
Bu haqda Prezident matbuot kotibi Sherzod Asadov brifingda xabar berdi, deya qayd etmoqda jurnalist Aziza Qurbonova.
17-18 avgust kunlari Shavkat Mirziyoyev Saudiya Arabistonida bo‘ladi. Bu oxirgi 30 yil ichida davlat rahbarining ushbu mamlakatga ilk tashrifi.
Shuningdek, hafta davomida Prezident huzurida ijtimoiy-iqtisodiy masalalar yuzasidan yig‘ilishlar o‘tkazilishi rejalashtirilgan.
Prezidentning tadbirkorlar bilan muloqoti 22-avgust kuni o‘tkaziladi.
O‘tgan yili davlat rahbarining biznes ahli bilan ilk ochiq muloqoti o‘tkazilib, 20 avgust yurtimizda Tadbirkorlar kuni deb belgilangandi.
Joriy yilda ham davlatimiz rahbari tadbirkorlar bilan uchrashib, sohadagi muammo va vazifalarni tahlil qiladi, biznes vakillarining taklif va tashabbuslari bilan tanishib, yangi yechimlarni ko‘rsatadi, tadbirkorlik rivojiga xizmat qiladigan qarorlarni qabul qiladi.
Sherzod Asadovning maʼlum qilishicha, bu yilgi tadbirni 22 avgust kuni o‘tkazish mo‘ljallangan. Maʼlumot uchun, bo‘lajak uchrashuvga tadbirkorlardan respublika shtabiga qariyb 8,5 mingta murojaat kelib tushgan, ularning 72 foizi hal etilgan.
