Qashqadaryolik erkak sexdan chiqayotgan badboʻy hiddan norozi boʻlib, oʻzini yoqib yubordi
Holatga Ekologiya boshqarmasi munosabat bildirdi.
Ijtimoiy tarmoqda Qarshi shahridagi fuqaro sexdan chiqayotgan badboʻy hiddan noroziligini bildirib, oʻzini yoqib yuborgani boʻyicha xabar tarqaldi. Holat yuzasidan viloyat Ekologiya va atrof muhitni muhofaza qilish boshqarmasi rasmiy izoh berdi.
Maʼlum qilinishicha, Qarshi shahridagi “Qarshi Leather” MCHJ shaklidagi xorijiy korxonasida ekologiya xodimlari tomonidan oʻrganish ishlari olib borilgan.
2021-yilning mart oyida Iqtisodiy sudning hal qiluv qarori asosida mazkur korxonaga kiritilgan daʼvo arizasi boʻyicha oʻtkazilgan oʻrganishlar natijasida atrof tabiiy muhitnni ifloslantirganlik holati aniqlangan va 284,0 mln soʻm miqdorida majburiy kompensatsiya toʻlovlari undirish boʻyicha qaror qabul qilingan.
Berilgan ekologik ekspertiza xulosasi talablarining bajarilishi, ifloslantiruvchi moddalarni me’yor darajasidan yuqori chiqqanligi va oʻrnatilgan talablariga rioya etilmaganligi boʻyicha aniqlangan kamchiliklar va atrof tabiiy muhitni ifloslantirganlik uchun keyingi oʻrganishlarda 346,0 mln soʻm miqdorida maʼmuriy kompensatsiya toʻlovi ham hisoblangan.
2021-yil noyabr oyida Ekologiya boshqarmasi tomonidan Iqtisodiy sudga mazkur xorijiy korxonaning faoliyatidagi kamchiliklarni bartaraf etgunga qadar vaqtincha toʻxtatish masalasida ariza kiritilgan.
“Qarshi Leather” MCHJ rahbarining 2022-yil mart oyida viloyat ekologiya boshqarmasiga yuborgan xatida korxona Xitoy davlat investorlari tomonidan 2022-yil 1-mart kunidan nomaʼlum muddatga toʻxtatilganligi, korxonaning suvlarini kanalizatsiya quvuriga qoʻyish boʻyicha biror bir toʻsiq va taʼqiqlar boʻlsa ular tomonidan kiritilgan investitsiya mablagʻlarini olib chiqib ketish hamda korxona faoliyatini butunlay toʻxtatilishi maʼlum qilinib, korxonaning ish faoliyatini qayta tiklash uchun Qarshi shahar kanalizatsiya quvurining gʻarbiy nuqtasiga chiqindi oqova suvlarini quyishni maʼlum qilgan.
Shuningdek 2021-yil oktyabr oyida mazkur MCHJ shaklidagi xorijiy korxonadan aholi yashash maskanlariga yaqin boʻlgan juda katta maydonga noqonuniy tashlangan chiqindi oqova suvlarini tozalash uchun viloyat hokimligi, viloyat IIB, viloyat Ekologiya boshqarmasidan ishchi guruh tuzilib, chiqindi suvlari tashlangan zovurlar katta mablagʻ hisobiga toʻliq tozalanib, ushbu zovur tuproq bilan koʻmib tashlangan. Hozirda mazkur joylar obodonlashtirilib, futbol maydonchalari tashkil etilgan.
“Yuqoridagi xabar boʻyicha viloyat ekologiya boshqarmasi masʼullari tomonidan oʻrnatilgan tartibda, tadbirkorlik subyektini oʻrganish boʻyicha vakolatli organlardan tegishli ruxsatnomalar olib, oʻz vakolati doirasida tezkor oʻrganishlar oʻtkaziladi”, — deyiladi xabarda.
