Respublika bo‘ylab arzonlashtirilgan yarmarkalar ish boshladi
Bozorchalar 20-avgustdan 5-sentabrga qadar har kuni ish vaqti chegarasida faoliyat olib boradi.
Mustaqillik bayrami arafasida O‘zbekistonning barcha shahar va viloyat markazlarida oziq-ovqat mahsulotlari arzonlashtirilgan bozorchalar tashkil qilindi.
Respublikaning barcha shahar va viloyat markazlarida Mustaqillik bayrami arafasida oziq-ovqat mahsulotlari arzonlashtirilgan bayram yarmarkalari ish boshladi. Bu haqda Qishloq xo‘jaligi vazirligi matbuot xizmati xabar berdi.
Mamlakatdagi dehqon bozorlari hamda aholi zich istiqomat qiladigan mahallalarda tashkil etilgan yarmarkalar 2022-yilning 20- avgustidan 5-sentabriga qadar har kuni bozorlarning ish vaqti chegarasida, yaʼni soat 08:00 dan 20:00 gacha ishlaydi.
Qayd etilishicha, Toshkent shahridagi asosiy 11 ta Farhod, Askiya, Sergeli, Eski Juva, Aviasozlar, Qo‘yliq, Yunusobod, Mirobod, Qoraqamish, Navro‘z va Chilonzor dehqon bozorlarida meva-sabzavot, poliz, dukkakli, guruch, go‘sht va sut mahsulotlari, tuxum, o‘simlik yog‘i, shakar va turli ichimliklar savdosi tashkil etilgan.
Qishloq xo‘jaligi vazirligi tegishli tashkilotlar bilan hamkorlikda maxsus oziq-ovqat yarmarkalarida qishloq xo‘jaligi mahsulotlarining sotilishini kunlik monitoring qilmoqda, ularning narx-navosi hamda bozorlarning mahsulotlar bilan taʼminlanganlik darajasini kuzatib bormoqda.
